„Сојузниците на НАТО се согласија Украина да стане членка“, изјави генералниот секретар на НАТО, Јенс Столтенберг. Говорејќи пред состанокот во Рамштајн, Германија, тој додаде дека откако војната ќе заврши, Киев мора да развие начини за спречување на нови напади.
Столтенберг додаде дека сега главниот фокус е Украина да се брани и да победи. Шефот на НАТО вчера изјави дека на Украина и е место во НАТО, но денеска додаде дека со тоа се согласуваат и другите членки.
„Да бидам јасен, Украина има заслужено место во евроатлантското семејство. Украина има заслужено место во НАТО“, рече тој вчера.
Лидерите на западните земји денеска се среќаваат во американската воена база Рамштајн, каде ќе разговараат за начините на кои можат да продолжат да и помагаат на Украина да се одбрани од руската агресија.
Американскиот министер за одбрана Лојд Остин, на чија иницијатива беше свикана средбата на Контакт групата за одбрана за Украина, ќе има воведно обраќање, соопшти Пентагон.
Ден пред средбата во Рамштајн, каде се очекуваат претставници на педесетина земји, Данска и Холандија најавија дека заеднички ќе и испорачаат на Украина 14 тенкови Леопард 2.
Украинскиот претседател Володимир Зеленски продолжува да ги повикува сојузниците да го забрзаат и зголемат снабдувањето со оружје од кое Киев е силно зависен.
На заедничката прес-конференција во Киев со шефот на НАТО, украинскиот лидер рече дека самитот на НАТО во Вилнус во јули може да стане „историски“ и додаде дека добил покана да присуствува на него.
Не е јасно како НАТО сојузниците се договориле за влез на Украина во Алијансата, бидејќи уште вчера германскиот министер за одбрана Борис Писториус изјави дека сега не е време да се одлучува за членството на Украина во НАТО.
Од друга страна, ако и кога Украина стане членка на најголемата воена алијанса, тоа ќе значи дека Русија ќе го има НАТО на својата граница, со уште една земја, бидејќи Финска му се приклучи на тој сојуз на почетокот на април, што речиси го удвои границата меѓу Алијансата и Русија, која има граница со Финска од дури 1.300 километри.
Од официјална Москва неколкупати се повтори дека за Русија влезот на Украина во НАТО е нешто што земјата нема да го дозволи и дека тоа е „црвена линија“.