Данил Медведев, вториот тенисер во светот, како и неговите сонародници кои заработуваат со играње тенис, прифатија да не играат под руско знаме поради војната во Украина, но тоа очигледно нема да биде доволно за да ја продолжат сезоната без забрани.
Се чини дека Англичаните се најригорозни.
Според последните информации кои ги објави британски „Експрес“, Медведев и сите други Руси и Белоруси, како и нивните колеги, ќе бидат суспендирани од овогодинешниот Вимблдон доколку не се согласат да ја потпишат „антипутин“ декларацијата.
За тоа зборуваше министерот за спорт на Велика Британија, Најџел Хадлстон, кој рече дека тоа е негова желба.
„Испративме барање до раководните тела кои се однесуваат на поединечни спортисти дека, доколку сакаат да учествуваат, мора да бидат независни и неутрални – и тоа е точно“ – изјави Хадлстон, пренесе „Експрес“.
Тој кажа и колку може да бидат строги барањата на Владата на Велика Британија.
„Сакаме со писмени декларации да обезбедиме дека нема да добијат пари од Путин, Русија или Белорусија, дека нема да даваат изјави за поддршка на Путин, Русија или Белорусија. Ако се изјаснат дека се неутрални спортисти, сакаме да бидеме сигурни дека се навистина неутрални и затоа не смееме да имаме никаква врска со Путин. Доколку некои поединечни спортови решат да воведат целосна забрана за руски или белоруски спортисти, ќе го поддржиме и тоа“ – заклучи Најџел Хадлстон.
На сите им е јасно дека Данил Медведев е најголемото име со кое се соочува ултиматумот на британската влада, иако има многу луѓе од Русија и Белорусија кои ќе настрадаат поради руската инвазија на Украина.
Затоа вниманието на светските медиуми кога се во прашање барањата во Велика Британија е целосно посветено на Медведев.
26-годишниот Русин неодамна за првпат во кариерата стигна до врвот на АТП листата, а таму наскоро би можел да се врати.
Почетокот на овогодинешниот Вимблдон е закажан за 27 јуни, а крајот е на 10 јули, а покрај руските и белоруските тенисери, уште е под знак прашалник и настапот на Новак Ѓоковиќ, шесткратниот победник на турнирот поради статусот околу вакцинацијата.