Пациентите со цистична фиброза се подготвуваат за нови протести-лек за сите се уште нема!

Или лек за сите или нови протести. Старо новите барања на пациентите со цистична фиброза повторно се актуализираат бидејќи и по околу седум месеци откако првично излегоа на улица, лек за сите нема.

Дванаесетте пациенти што беа помеѓу посреќните и пред околу четири месеци добија терапија стравуваат дека и за нив нема да има „Трикафта“ во иднина, а во меѓувреме бараат сите да добијат лек и ветувањата на надлежните да не останат само празни зборови. Триесет и седум годишниот Бојан Крстевски, вели дека со месеци се во неизвесност.

Според пациентите, нема ништо ново и во однос на ветувања од надлежните дека за нив ќе се отвори посебен центар за лекување за да има соодветни услови за нивните потреби. Крстевски алармира дека веќе и со месеци го немаат и неопходниот ензим кој мора да го пијат со секој оброк, па секој се снаоѓа како знае и умее.

Од Министерството за здравство молк. До почетокот на вестите не добивме одговор на прашањата што се случува со преговорите со производителот на „Трикафта“ и зошто пациентите не се вклучени во Комисијата која е формирана за цистична фиброза.

Инаку, битката за „Трикафта“ е со години, но во Македонија првпат стигна во март и тоа за за мал број на пациенти, откако претходно почина 45 годишниот Благојче Илиевски кој не го дочека лекот.