Традиционално голем интерес за учество на меѓународниот конкурс „Велес 2026 – Златен стрип“

Стрип центарот на Македонија со седиште во Велес, во почетокот на месец март 2026 година го објави традиционалниот интернационален стрип конкурс „Велес 2026 – Златен стрип“. Како дел од реномираниот Меѓународен стрип салон, оваа манифестација годинава бележи силен бран на интерес, особено преку интензивираната соработка со основните, средните и приватните училишта, како и со ликовните студија ширум државата.

Стручниот соработник на Стрип центарот, Томе Трајков, вели дека атмосферата околу овогодинешниот конкурс може да се опише како „Светот црта – Велес изложува “. Оваа манифестација е епицентар на македонскиот стрип, со докажан интернационален авторитет водејќи ги младите автори по патот од првата линија до првата изложба.

Тој посочува дека младите сè повеќе се свртуваат кон деветтата уметност, поттикнати од наставниот кадар кој израснал во ера на голема популарност на стрипот кај нас. Создадена е заедница која расте, стрипот се развива низ цела Македонија, а не е заборавена ниту метрополата, од каде што редовно пристигнуваат доста квалитетни дела.

„Се свртуваме кон сите средини во државата, овозможувајќи им на учениците да се изразат на својот мајчин јазик. Интересот е навистина голем бидејќи стрипот им припаѓа на сите граѓани на државата. Тоа континуирано трае околу 80 г .Ги потсетуваме сите заинтересирани автори дека годинашниот стрип конкурс е отворен за пријавување до 1 август 2026 година. Иднината на стрипот се црта тука“, изјави Трајков.

Предизвиците со формалното образование

Трајков направи паралела со регионот, нагласувајќи дека во Хрватска стрипот се изучува факултативно во училиштата, додека во Бугарија тој е веќе дел од високото образование. Наспроти тоа, кај нас образовниот систем сè уште заостанува, иако има мали придвижувања. Сепак, Стрип центарот не чека институционални решенија – преку интензивна и континуирана соработка со училиштата, стрипот веќе наголемо е навлезен помеѓу учениците насекаде низ Македонија.

„Кај нас работите минимално се придвижија во насока стрипот да се вклучи барем во рамките на часовите по ликовно образование. Сепак, тој сè уште не се изучува како посебен предмет, ниту во Државното средно училиште за ликовна уметност и дизајн ‘Лазар Личеноски’ во Скопје, ниту пак на Факултетот за ликовни уметности. И покрај ова, младите таленти кои се школуваат тука се нашето иницијално јадро. Оваа силна стрип заедница веќе масовно и успешно учествува на разни стрип конкурси и фестивали во земјата и во странство“, објаснува Трајков, додавајќи дека токму во овие млади луѓе лежи светлата стрип иднина.