Томовски: Воведувањето на обоените регистарски таблички за службените возила придонесе за 70 процентно намалување на злоупотребите

Во „Тема на денот“ на МРТ гостуваше организациониот секретар на ВМРО-ДПМНЕ и директорот на Службата за општи и заеднички работи, Ивица Томовски, кој говореше за активностите на институцијата насочени кон модернизација на возниот парк, намалување на злоупотребите на службените возила и регулирање на статусот на државниот имот.

Осврнувајќи се на воведувањето на обоените регистарски таблички за службените возила, Томовски оцени дека мерката дала видливи резултати. Според него, воведувањето на обоените регистарски таблички за службените возила придонело за околу 70 проценти намалување на злоупотребите.

„Искрено, задоволен сум, можам да кажам дека едно 70% е искоренета онаа злоупотреба. Сигурен сум дека ја има, повторно, некаде некои од пониските ешалони кои што сакаат да ги злоупотребат тие, меѓутоа се надевам дека граѓаните се доволно свесни, разумни, можат да сликаат, можат да пријават на телефонскиот број и на мејл адресата каде што ги имаме објавено од службата и ние да ги споделиме со вас медиумите, па ете ако не разбрале како треба да се однесуваат со државниот имот и сопственоста на народот, тогаш да им покажеме на дело“, рече Томовски.

Тој најави дека СОЗР започнува и пилот-проект за набавка на три електрични возила, кои ќе ги користат курирските служби за достава на документација меѓу државните институции во Скопје.

„Еве сега имаме истражување на пазарот, имаме еден мал мини проект во Службата за општи заеднички работи, планот ни е да набавиме три електрични возила за во градот Скопје, каде што ги користат нашите курирски служби, оние луѓе кои што разнесуваат дневно документи од институција во институција. Тоа ќе ни биде пилот проект, да видиме дали е издржливо и дали можеме во нашата држава со онаа инфраструктура која што ја имаме за полначи на батериите, дали може да се издржи“, вели Томовски.

Говорејќи за државниот имот, Томовски потсети дека при преземањето на функцијата биле утврдени сериозни нерегулирани состојби, при што дел од државните објекти, меѓу кои и репрезентативни вили, немале имотни листови.

„Не знам зашто никој не се одлучил овие објекти да ги легализира. Имало некакви постапки кои што биле заглавени во државните лавиринти, но верувајте доколку сакате нешто да реализирате, ќе го реализирате. Ние направивме измена на законот, после таа измена на законот целиот државен имот го ставивме на располагање на службата, но е сопственост на Република Македонија. Нашата цел беше да можеме да почнеме овие објекти да ги реновираме, тие се во функција, но бидејќи не биле долг период реновирани, прокапуваат, имаат сериозни проблеми, но за да можете вие тоа да го направите како постапка за реновирање, тендерска постапка, морате првично да имате имотен лист. Денеска можам да кажам со оној имот со којшто располага Службата за општи заеднички работи, целиот е со имотен лист и е во служба на државата“, рече Томовски.