САД по Венецуела се вртат кон Гренланд
Откако Соединетите Американски Држави вчера го заробија венецуелскиот претседател Николас Мадуро, американскиот претседател Доналд Трамп изјави дека неговата администрација ќе „ја предводи Венецуела“ сè додека не се спроведе транзиција на власта. Таа изјава, како и самата воена интервенција, предизвика загриженост дека Трамп може да го насочи своето внимание кон други делови од светот.
Поточно, стравувањата за Гренланд повторно се разгореа, откако членовите на движењето МАГА (Америка повторно голема) на Трамп отворено почнаа да се осврнуваат на можноста за американско преземање на таа територија.
Дополнителни тензии предизвика објавата на Кејти Милер, десничарска активистка и сопруга на Стивен Милер, моќниот заменик-шеф на кабинетот на Трамп за политика. Доцна синоќа на социјалната мрежа Икс таа сподели мапа на Гренланд со американско знаме поставено над неа, заедно со краток коментар: „НАСКОРО“ („SOON“).
Објавата следеше само неколку часа по американската воена агресија на Венецуела и киднапирањето на Мадуро, и во Данска беше сфатена како провокација и закана за анексија.
Данскиот амбасадор во САД Јеспер Молер Серенсен реагираше на објавата со споделување наведувајќи „пријателски потсетник“ за долгогодишните одбранбени врски меѓу двете земји.
„САД и Данска се блиски сојузници и треба да продолжат да соработуваат. Безбедноста на САД е и безбедност на Гренланд и Данска. Гренланд е веќе дел од НАТО“, порача Серенсен, додавајќи дека двете земји веќе тесно соработуваат на Арктикот.
Тој исто така нагласи дека во 2025 година Данска ги зголемила средствата за одбрана на 13,7 милијарди долари, токму за безбедноста на Арктикот и Северниот Атлантик.
„И да, очекуваме целосно почитување на територијалниот интегритет на Кралството Данска“, додаде тој.
Премиерот на Гренланд Јенс Фредерик Нилсен му порача на претседателот Трамп дека треба да прекине со заканите упатени во неговата земја.
,,Со генерации сме близок и лојален пријател на Соединетите Американски Држави. Стоевме рамо до рамо во тешки времиња. Презедовме одговорност за безбедноста на Северниот Атлантик, а не и на Северна Америка. Тоа го прават вистинските пријатели.
Токму затоа непосредната и повторувачка реторика од Соединетите Американски Држави е целосно и апсолутно неприфатлива.
Кога претседателот на Соединетите Американски Држави зборува за „ни треба Гренланд“ и нè поврзува со Венецуела и воена интервенција, тоа не е само погрешно. Ова е толку непочитувачко.
Нашата земја не е предмет на реторика на суперсила. Ние сме народ. Земја. И демократија. Ова мора да се почитува. Особено од блиски и лојални пријатели”, порачува Нилсен.
Comments are closed.