Лефков: Најостро ги осудуваме заканите на Ковачевски до медиумите дека ќе квицкаат по подруми, повикуваме Делегацијата на ЕУ и сите меѓународни организации да го осудат ваквиот однос

Изразуваме најостра осуда и згрозеност од изјавите на Ковачевски за медиумите кои комплетно можат да се дефинираат како изјави за цензура и закани за сите медиуми во Македонија. Кога Ковачевски им упатува порака на медиумите дека повторно ќе квицкаат по подруми е незапаметен атак врз слободата на медиумите, истакна Миле Лефков, член на ИК на ВМРО-ДПМНЕ и пратеник.

-Во продолжение на оваа пресконференција ќе емитуваме и видео материјал од дел од напади на Ковачевски кон медиумите.

Имено, дозволете ми сега да прочитам изворно од изјавите на Ковачевски и дозволете пред да го направам истото, како политичка партија да се извиниме што воопшто мораме да цитираме вакви зборови.

Најпрво, на мизерните настани кој ги прави СДС пред избори Ковачевски рече:

-Национални телевизии во најголем број веќе не потсетуваат како изгледа 2006 година така и овие не потсетија, и затоа од тука сакам да им порачам: Џабе фатиле страна, пак ќе квицкаат по некој подруми.

Понатаму:

-Е тоа ви е кога медиумите ќе се стават во функција на една политичка партија, а они самите се продале, они уште сега се продаваат, пошто вика биткоин се купува кога е најевтин и затоа сега таму се тргнати и ова мора да го кажам, па утре нека се лутат, ќе пушти ЗНМ ќе се јават да се извиниме, ќе се извиниме.

Да потсетиме и на малку постарите изјави кои од позиција на претседател на влада, кога Ковачевски го правдаше Ахмети кој нападна две национални телевизии и рече:

-Кому му служиме со овие поделби што се прават? Се разбира непријателите на Албанците, тие аплаудираат, Алфа, Телма, Мелма тоа се тие, кажа тогаш Али Ахмети, на што Ковачевски се надоврза и поддржа:

– Во државата има медиум, чија што уредувачка политика повеќе наликува на уредувачка политика на компанија која што тргува со енергенси, а има и медиум чија што уредувачка политика повеќе личи на уредувачка политика на партиски сектор за комуникација. – Ковачевски

Димитар Ковачевски упатува директни закани кон медиумите и новинарите. Неговите закани се со цел да се заплашат новинарите и да влијае на нивното известување. Воедно ја повикуваме и Делегацијата на ЕУ, сите меѓународни организации и претставници на меѓународната заедница да реагираат на ваквиот чин, затоа што ВМРО-ДПМНЕ вистински се грижи за слободата на изразување, слободата на говор и слободата на медиумите, а ваквите показатели не сакаме да бидат нотирани во идниот Извештај на ЕК само затоа што еден неумесен политичар во заминување решил да го руши реномето на Македонија, додава Лефков.