ВМРО-ДПМНЕ: Изворот на сите проблеми со Бугарија е владата на СДСМ која потпиша договор кој и за најголемите бугарски националисти беше победа. Ако СДСМ е толку силна како што тврди Ковачевски, ајде на избори!

„Изворот на сите проблеми со Бугарија е владата на СДСМ која потпиша договор кој и за најголемите бугарски националисти беше победа“, ова денеска преку соопштение до јавноста го истакнаа од ВМРО-ДПМНЕ.

„ВМРО-ДПМНЕ уште во 2017 година кога Заев го спремаше договорот кажа дека тој е асиметричен, со права за Бугарија, а обврски за Македонија. И најголемите бугарски шовинисти не можеа да поверуваат дека Заев и СДСМ како договорна материја ставаат тези кои и тие самите никогаш не ги кажале. Дури и покојниот Божидар Димитров беше фрапиран од Заев, и го сметаше договорот за апсолутна победа на Бугарија. Од тој договор навака сите барања на Бугарија се уште полоши и понегаторски. Тоа што Ковачевски го турка денес е надградено од тоа Заев што го постави пред 5 години“, велат од партијата.

Од партијата додаваат дека протоколот и договорот не враќаат назад, а не не водат напред. За да помине се потребни се уставни измени, кои ВМРО-ДПМНЕ нема да ги поддржи.

„Излез од оваа криза и од понижувањата за Македонија се само предвремени парламентарни избори“, истакнуваат од ВМРО-ДПМНЕ.

„Ковачевски досега нема победено на избори. Во Центар Жупа победи ТДП, а не СДСМ. Во Тетово истата ТДП одеше посебно на избори од СДСМ. Впрочем во Тетово СДСМ и Ковачевски загубија два спрема еден од ВМРО ДПМНЕ. Ковачевски може да победи само со замислен противник и онаму каде ќе истури од крадените пари“.

Од партијата прашуваат дека ако Ковачевски толку верува дека СДСМ е силна партија тогаш зошто бега од избори.

„Го повикуваме да распише избори и да видиме народот што ќе им порача за сите криминали и предавства“, велат од ВМРО-ДПМНЕ.