Ковачки: Власта со новиот предлог ги прифаќа сите бугарски барања, во 19 часот на протест пред Влада да кажеме НЕ за асимилација на Македонија
Димитар Ковачевски, Бујар Османи и Бојан Маричиќ со новиот предлог ги прифаќаат сите бугарски барања, обвинува пратеникот и член на ИК на ВМРО-ДПМНЕ, Драган Ковачки.
Тој истакнува дека бугарскиот предлог е капитулација, а Ковачевски и Османи ја капитулираат Македонија.
„Драги пријатели,
Предлогот кој е на маса, и кој владата го криеше, а до кој дојдовме ние по наши канали, всушност е истиот кој веќе еднаш беше одбиен.
И со жалење морам да констатирам дека овој предлог ги содржи сите бугарски барања и во делот на историјата, и во делот на јазикот, и во делот на идентитетот.
Прифаќањето на ваквиот предлог подразбира целосно право на Бугарија да менува учебници и да ги пишува согласно бугарскиот диктат, а нашите деца во основното образование да учат според бугарскиот диктат или нема европска иднина. Прифаќање дека Гоце Делчев, дека Даме Груев, дека Јане Сандански и останати херои и револуционери биле Бугари, дека македонскиот јазик е дијалект на бугарскиот.
Секој кој како владата Ковачевски, Османи и Маричиќ ќе ви кажува нешто поинаку, ви кажувам со целиот мој дигнитет и име, дека не ја говори вистината или да бидам подиректен ве лаже.
И затоа имаме какафонија од предлози, два документи, два процеси, сменети зборчиња, семантичка инверзија кои владата ни ги покажува за успех. Еве ви кажувам дека лажат и манипулираат.
Јас и ВМРО-ДПМНЕ да се знае уште сега во таков процес нема да бидеме соучесници, ќе се бориме за вистината и против ваквиот нокаут на македонската дипломатија.
Еве ги тие два документи. Бидејќи владата требаше да ги објави, еве ние ги прикажуваме на јавноста.
Првиот документ кој што секоја една земја која што имала аспирации да биде дел од ЕУ го нарекува меѓувладина конференција, а кај нас тоа се вика прв дел од меѓувладината конференција, а ова е практично вториот дел од таа меѓувладина конференција, која што само за нас е создадена како кованица и се нарекува втора меѓувладина конференција.
Каде е суштината и каде е направена лингвистичката инверзија. Најпрвин во првиот документ, кој што би требало според владата да се нарекува прва меѓувладина конференција, на страна 5 точка 3 стои дека во преговарачката рамка, и двете страни ќе дадат унилатерални изјави, декларации коишто ќе кажат како го подразбираат македонскиот јазик.
Претпоставувам доколку ова стигне до Брисел од нашата македонска страна истото ќе биде македонски јазик, а од страна на Бугарија ќе има еднострана изјава дека тие не го признаваат македонскиот јазик односно дека тие го признаваат согласно Уставот на Македонија.
Следната семантичка измена е во страната 10 од овој прв документ кој треба да биде документ содржан во преговарачката рамка. Каде што точно се цитира во точка 5 соодветната алинеја, договорот за добрососедство со Бугарија, каде што делот билатерални протоколи е заменет со годишни извештаи и мерки за ефективната имплементација по членот 12. Членот 12 од договорот за добрососедство ќе биде практично одлучувачки член врз основа на кој ние или ќе напредуваме или ќе бидеме подложни на вето од страна на нашиот источен сосед. А членот 12 сакам да посочам дека е делот каде што се регулирани меѓувладините конференции помеѓу Македонија и Бугарија. Досега се одржани две такви, првата формална помеѓу Димитров и Захариева и втората помеѓу Османи и Генчовска за која што протоколот се уште не е потпишан, а ќе видите дека се повикуваат и на тој протокол.
Појаснувам протоколот е заменет со годишни прегледи и мерки и мерки. Што значи мерки, ако немате во учебниците променето дека Илинденското востание, македонско заменето со бугарско Преображенско тогаш не сте презеле мерки и вие не може да напредувате и ќе бидете подложни на вето. Ако уште во процесот на преговори во учебниците на нашите основци стои Гоце Делчев, Даме Груев, Јане Сандански дека се македонски херои, вие не можете, бидејќи не сте презеле мерка и ефективно таа мерка не сте ја имплементирале. Ете тоа е разликата за која што Османи и Маричиќ се препелкаат и не знаат како да ја објаснат.
Вториот документ кој е практично втор дел од таа меѓувладина конференција на страна 7, точка 11 јасно стои дека Македонија нема да го отвори првиот кластер фундаменталс се додека не се случат уставните измени на кои што се повикуваат заклучоците од Европскиот Совет.
Значи нема отворање на преговори, кластер фундаменталс се додека не се случат уставните измени.
На страна 8, е избришан делот каде во првиот стоеше делот за јазикот и е префрлен сега во првата половина според нив наречена прва меѓувладина конференција и јасно сега стои дека Македонија не може да го почне процесот на преговори, се додека не биде потпишан протоколот, од втората средба на заедничката меѓувладина комисија која што е основана врз основа на членот 12 од договорот за добрососедство кој го има нашата влада потпишано со нашиот источен сосед.
Што подразбира тоа. Тоа е оној протокол во кој се содржани историјата, културата, сето она кое што треба да го направиме како измена и мерка во нашите учебници.
Сето она кое што го слушате од Ковачевски не е визија, не е стратегија не е битка за идните генерации, тоа е срам за идните генерации. Тоа е пораз и капитулација која идните генерации ќе ја имаат како грутка во својата душа затоа што некој како Ковачевски и некој како Бојан Маричиќ се дрзнале да го погазат македонскиот идентитет. Идентитет за кој крв се давало, за кој жртви паѓале, за кој мајка од дете се делела, мајка од ќерка се делела. Тоа денеска не убедуваше Ковачевски во друштво на Бујар Османи и останатите дека било визија.
Не е тоа визија. Тоа е срам и предавство. Тоа е она за кое ВМРО-ДПМНЕ нема да прифати и ќе се бори да истото тоа со сето она кое што го располага ВМРО-ДПМНЕ да го објасни пред македонските граѓани.
Ваков ултиматум за Македонија, драги пријатели – НЕ, благодарам!
Сакам да се знае дека сега е моментот кога треба да се биде јасен, гласен и да се заземе вистинска страна, страната на Македонија и страната на народот.
Впрочем, оваа влада прави огромна штета бидејќи одобрувањето на ваква рамка значи или во ЕУ, асимилирани и бугаризирани, или секогаш да останеме надвор од ЕУ.
Јас ултиматуми по цена на достоинството на народот не прифаќам и нема никогаш да се согласам со тоа.
Затоа велам, дека треба да сме гласни!
Имаше, драги пријатели, иницијатива за протести и ВМРО-ДПМНЕ ќе се приклучи на таа иницијатива и повикувам на народен, сенароден протест.
Сенароден!
Заборавете дека се обраќам од говорницата на ВМРО-ДПМНЕ, секој оној кој што ја слуша оваа прес конференција и кој што мисли дека јас ова што го зборувам е така, нека ни се придружи во сабота пред платото на владата на Република Македонија во 19 часот.
Јас таму ќе бидам како еден од многуте, како ваш сограѓанин, како човек со име и презиме и затоа го повикувам целиот народ од цела Македонија но и надвор од Македонија да ни се приклучат и да застане со нас, рамо до рамо и да го одбраниме она што се вика европска вредност и да го спасиме процесот на преговори затоа што овој преседан денеска и се прави на Македонија ќе им се прави на сите земји во регионот и членството во ЕУ за сите нас ќе стане, во суштина цел која никогаш нема да ја достигнеме.
Ние треба да преговараме за нешто што се случило пред десеттина векови, а се бориме за иднината на нашите деца.
Ковачевски, Османи и Маричиќ се на пат да спроведат Бугаризација.
Ова не смее да помине. Премногу е!
Предлогот кој Ковачевски, Османи, Пендаровски и останатите го претставуваат како модифицирана верзија, всушност е истата која наводно ја одбија пред една недела. Тоа е првата лага на Владата. Во овој предлог наместо отворање на европерспектива, се овозможува легална рамка Бугарија да условува со идентитетски теми, јазикот, историјата, промени на учебници, споменици, настани и други понижувачки барања.
Тоа Османи и Ковачевски им го обезбедуваат на бугарската страна преку годишните извештаи за спроведувањето на членот 12 од билатералниот договор од 2017-та кој што се однесува токму на овие чувствителни прашања. Па така ако на Бугарија не и се допадне некоја реченица во учебник, некоја лекција за Гоце Делчев или Илинденското востание, тие преку овој механизам би го блокирале пристапувањето на Македонија, само затоа што на тоа се согласила нашата страна.
Согласно овој Протокол, кој владата го нарекува годишен извештај, а кој е дел од условите за преговори, Македонија се обврзува на промена на учебник по географија за 7-мо одделение до почетокот на идната учебна година, промена на лекциите за Цар Самоил согласно одлуките на Комисијата за историја, заеднички годишен календар за 2022 и 2023 година за заеднички прослави на заеднички историски настани и личности.
Дозволете ми да цитирам само еден дел од Протоколот кој Владата сака да го сокрие:
„Двете страни да подготват и презентираат примероци од лекции врз основа на препораките на Комисијата, за кои Комисијата постигна согласност приложени кон Протоколот на следниот состанок на Мешовитата меѓувладина комисија според член 12 од Договорот за пријателство, добрососедство и соработка и да ги вклучи во иднина на соодветните наставни програми, учебници и други релевантни наставни материјали, натписи на табли, историски монументи, споменици и информативни материјали во музеи и други локации од образовно и културно значење, како и во електронски информативни досиеја на јавен имот“.
Ова е срамно. Ова е капитулација. Ова е свесна согласност на владата за прифаќање на сите бугарски барања, прифаќање на асимилација како услов за членство.
Дополнително, Дури и самиот фактички почеток на преговорите, односно отворањето на кластери е условено со промена на македонскиот Устав. Ова само покажува дека се работи за усложнување на процесот на преговори кој не важел за ниту една земја кандидат претходно. Со други зборови ако се прифати предлогот самите како земја даваме согласност Бугарија да има право да блокира постојано и на тој начин или ќе станеме вечни преговарачи или пак ќе се асимилираме по бугарски диктат.
Македонија мора да бара евроинтеграцијата да се води исклучиво на досегашните европски принципи и вредности, а не преку ултиматуми и уцени.
Затоа вечерва од 19:00 часот пред Влада на Република Македонија има протест против понижувачкиот и асимилаторски предлог кој ни го нудат Ковачевски, Маричиќ и Османи.
Ова не е партиски протест.
Ова не е протест на ВМРО-ДПМНЕ.
Ова е протест на народот на Македонија.
Ова е протест на Македонците ЗА Македонците.
Ова е протест на граѓаните на Македонија ЗА Македонија.
Ова е гласно кажување НЕ на обидот за асимилација и бугаризација на Македонците.
Ова е гласно кажување НЕ за македонскиот јазик како дијалект на бугарскиот јазик.
Ова е гласно кажување дека Гоце, Даме и Јане се Македонци, а не се Бугари!
Протестот е гласно предупредување и потсетување дека 100-те стапа што мислат дека ги маваат по туѓ грб и дека не болат, дека имаат два краја.
Почитувани Македонци,
Планот и стратегијата кои ни ги споменува Ковачевски не се негови, туку туѓи.
Ковачевски и Османи работат за туѓи, а не за македонските национални интереси.
Престанете да ја навредувате интелигенцијата на Македонците!
Го повикуваме македонскиот народ, граѓаните на Скопје, граѓаните на Македонија, македонската интелектуала, колумнисти, лекари, естрадни уметници, припадници на безбедносни сили, војска, полиција, царина, од левичари до десничари, слободно-мислечки граѓани, партиски определени или неопределени.
Ги повикуваме членовите и на симпатизерите на нашиот политички опонент СДСМ.
Сега е моментот да покажеме единство, да ги надминеме партиските разлики и недоразбирања, и да испратиме јасна порака дека нема да дозволиме да ни ја ретушираат македонската историја, да ни ги менуваат македонските учебници и да ја избришат колективната меморија на македонскиот народ.
Оти без македонски народ, ќе го нема ниту ВМРО-ДПМНЕ ниту СДСМ, ниту друга македонска партија.
Време е за разум и кревање глас.
Се гледаме вечер во 19 пред Влада“.