Русија им даде рок на украинските власти до 15 часот по локално време (07:00 часот по средноевропско време) во недела за да се одлучи дали ќе се состанат на разговори во белорускиот град Гомел.
Владимир Медински, шеф на руската делегација и помошник на претседателот Владимир Путин, изјави за државната новинска агенција РИА Новости дека ќе останат до даденото време и ќе чекаат одговор.
„Штом ќе ја добиеме оваа потврда, веднаш ќе тргнеме да се сретнеме со нашите колеги во преговорите“, рече Медински. „Ние се залагаме за мир“.
Сепак, украинскиот претседател Володимир Зеленски рече дека би бил подготвен да разговара со Русија, но го отфрли нивниот предлог за средба во Белорусија.
Белорусија е сојузник на Русија и одигра клучна улога во руската инвазија на Украина. Според украинските власти, руските трупи извршиле инвазија преку границата со Белорусија со поддршка од владата на Белорусија. Администрацијата на Бајден потоа санкционираше девет белоруски одбранбени фирми за нивната поддршка на инвазијата.
Зеленски директно и се обрати на Белорусија во своето обраќање, велејќи дека „агресивните дејствија“ од белоруската територија значат дека не е можно да се водат разговори во земјата. Украина соопшти дека пресретнала крстаречка ракета лансирана кон Киев од белоруска територија.
Американскиот Стејт департмент во четвртокот рече дека Зеленски останува „главна цел за руската агресија“, додека самиот Зеленски рече дека „непријателот ме означи како цел бр. 1“.
„Доколку разговорите бидат отфрлени, украинската страна ќе ја сноси целата одговорност за крвопролевањето“, рече Медински. „Но, ние остануваме тука до 15:00 часот и чекаме одговор од украинската страна“.
Белорускиот претседател Александар Лукашенко во неделата изјави дека „чека“ Украина да дојде во земјата на преговори со Русија, чиј домаќин е Белорусија.
„Чекаме. Сите се во Гомел и чекаат. Ако дојдат, тогаш ќе има преговори“, им рече Лукашенко на новинарите по гласањето на уставниот референдум во Минск во неделата, според белоруската државна новинска агенција Белта.
Портпаролот на Кремљ, Дмитриј Песков, изјави за новинарите дека руска делегација веќе пристигнала во Белорусија на национални разговори со украинските претставници, објави РИА Новости.