Тошковски смирува: Пожарот во Трубарево е локализиран, нема радијациско зрачење, нема страв од ширење – жителите во близина да ги напуштат домовите

Пожарот во Трубарево е локализиран, нема опасност за негово проширување, но се уште е активен. За да се елиминира опасноста од загаденоста на воздухот на жителите што се најблиску до жариштето им се препорачува да ги напуштат домовите и им се ставени на располагање сместувачките капацитети  во Центарот за обука во Идризово, рече на прес-конференција министерот за внатрешни работи Панче Тошковски по седницата на Управувачкиот комитет за справување со кризи. 

Приоритет, истакна Тошковски, е заштита на животот и здравјето на граѓаните.

Тој соопшти дека Дирекцијата за радијациска сигурност утврдила дека нема радијациско зрачење,  додека АБХО единицата на Министерството за одбрана констатирала дека во непосредна близина има висока концентрација на штетни супстанци на 150 метри од жариштето. Над 200 метри загаденоста е ниска, а над 400 метри не е констатирана загаденост, рече Тошковски.

Во полициска станица се вршат разговори со три лица, сопственици или управители на предметниот објект.  Оперативните активности за расчистување на настанот продолжуваат во координација со јавен обвинител, соопшти Тошковски.

Истакна дека ваков тип на пожар првпат настанува на територија на државата на ваков тип на фабрика за рециклирање отпад.

– Првпат имаме  ваков тип пожар во Македонија, побаравме и добиваме стручна помош од домашни и странски експерти. Нивниот совет беше дека кај ваков тип на пожари треба да се дејствува така што ќе се затрупа со песок. Ова што се случува се должи и на негрижа од претходни влади и тоа доведе до овие проблеми, и во Вардариште и Дрисла, рече Тошковски.

Дополни и дека располагаат со соодветна опрема, доставени се гас маски и маски Н95 за жителите кои се во најголем ризик т.е. на радиус од 150 метри.

Се евакуираат најзагрозените жители на Трубарево кои се блиску до објектот кој изгоре.

„Припадници на МВР од куќа во куќа влегуваат и им кажуваат дека треба да ги напуштат. Најризичен периметар се на 150 метри од местото на пожарот. Веднаш се упативме кон домовите на луѓето. Министерството за здравство даде препораки за вакви кризни ситуации“, изјави Тошковски.

Министерот објасни дека на 150 метри од огништето е утврдено високо ниво на опасност. „Од 150 до 200 метри е средно ниво на опасност.

Од 200 до 400 метри е ниско ниво на опасност. Над 400 метри не се утврдени загадувања кои би биле штетни. Тоа се информациите кои ги добивме“, додаде министерот.