На алармантен број заразени и починати: Државата најави полошо сценарио додека планира враќање на децата во училиштата и градинките

Евентуалното полошо сценарио со вирусот Ковид-19 наесен би значело поголема концентрација на луѓе во затворени простории, дополнителен број на заболени од сезонски грип што може да доведе до пренатрупување на болниците со пациенти и тоа да не може да се изменаџира. Ова сценарио, како што вчера нагласи министерот за здравство Венко Филипче, би можело да се избегне, но доколку тоа не се случи, здравствените власти ќе го дочекаат подготвени.

Вториот бран на вирусот, според Филипче, бил резултат на непочитувањето на мерките за заштита. Тој смета дека мора да има санкции таму каде не се почитуваат мерките. Изминатиот период, како што рече, имаше потфрлања, не се контролирале луѓето и местата каде се организирале настани. И граѓаните мора да се свесни дека мерките треба да се почитуваат за да го заштитат сопственото и јавното здравје.

За секој еден пациент со Ковид-19, Филипче тврди дека е направено се што треба и во однос на стадиумите пред поставувањето на респираторна машина, и во однос на третманот додека се пациентите на респираторна машина.

Тој вчера соопшти и дека во следните недела до две ќе се знае дали од септември ќе почнат со работа градинките и училиштата. Веројатноста, како што рече, е голема, но да се усогласат сите протоколи.

Родителите чии дечиња посетуваат градинки веќе се информирани дека од први септември вратите на предучилишните установи ќе бидат отворени.

На големо се зборува и за тоа дека наместо он-лајн настава, децата се враќаат во училиште.

Логично е да се постави прашањето: Која е логиката ако децата не посетуваа настава од март кога имавме едноцифрен и двоцифрен број на заразени, да се враќаат сега кога бројките на заразени и починати се повеќе од загрижувачки?!

-Одржавме неколку состаноци и со претставници од Министерството за образование и од Министерството за труд и социјална политика, со членовите на Комисијата за заразни болести. Различни се предизвиците во училиште, а други се во градинка. Следната недела ќе се донесе одлука. Мора да имаме протоколи што ќе бидат водич за спроведување на наставата. Помали групи во училиштата, како резултат на тоа повеќе смени и покус час. Што пократко време во затворен простор. Доколку може, и наставниците да бидат ограничени во контактите со групите деца што ги учат. Ако е помала групата на деца, а тој наставник заболи, сите од групата се во ризик. Мали групи, честа дезинфекција, сите со маски, вели Филипче.

Во земјава вчера беа регистрирани 113 нови случаи со Ковид-19. Од нив во Скопје-35 нови, Штип-23, Гостивар-15, Куманово-12, Битола-седум, Охрид-шест, Тетово-пет, Кочани и Демир Хисар по два, а Прилеп, Струга, Пробиштип, Македонски брод, Валандово и Виница по еден случај.

Починаа шест пациенти, три од Скопје, на 64, 22 и 83 годишна возраст, еден од Куманово на 72 години, еден од Струга 48-годишен и еден од Охрид на 75 годишна возраст. Дваесет и двегодишниот пациент од Скопје, како што соопшти вчера Министерството за здравство, имал Даунов синдорм. Тој во тешка општа состојба бил примен во болницата „8 Септември“ на 16 јули. Пет пациенти се починати во болнички услови, а еден вонболнички.

Оздравеа 259 пациенти од: Скопје-103, Штип-75, Тетово-31, Гостивар-19, Куманово-13, Свети Николе-4, Битола, Кавадарци, Кочани, Пробиштип, Кратово и Ресен по двајца, Демир Хисар и Дебар по еден пациент.

На Инфективната клиника вкупно се хоспитализирани 83 пациенти од кои на кислородна поддршка се 49 пациенти, а еден е на механичка вентилација. Во болницата во Козле се хоспитализирани 15 возрасни пациенти позитивни на Ковид-19 и шест деца позитивни на вирусот. Во ГОБ „8 Септември“ вкупно хоспитализирани се 78 пациенти од кои на респираторна машина се тројца пациенти.

Во болницата во Битола се хоспитализирани 30 пациенти, а во болницата во Штип се хоспитализирани 48 пациенти. На инфективните одделенија во Тетово, Охрид, Велес, Куманово, Прилеп, Гостивар, Струмица и Струга се хоспитализирани 120 пациенти – позитивни и сомнителни на Ковид-19.

Вкупната бројка Ковид дијагностицирани во нашата земја од почетокот на епидемијата е 11.399, бројката на оздравени пациенти е 7.480, на починати е 517, а во моментов бројот на активни случаи во земјата изнесува 3.402.

Во Скопје има најмногу активни случаи 1.231, а од нив во општината Чаир– 164, Аеродром – 139, Кисела Вода – 129, Гази Баба – 121, Карпош – 110, Центар – 101, Шуто Оризари – 100, Бутел – 80. По Скопје, најмногу активни случаи во земјава има во Штип – 381, потоа во Гостивар – 283, Куманово – 260, Струга – 187, Тетово – 186, Свети Николе – 130, Дебар – 117, Кичево – 109.

Досега во земјата се направени вкупно 109.946 тестирања на Ковид -19.

Правилната употреба на маската или прекривката за лице е клучна за ефикасно спречување на ширење на вирусот Ковид-19. Носењето заштитна опрема за покривање на носот и устата е задолжително во сите јавни затворени простори, како што се средства за јавен превоз, маркети, банки, пошти, амбуланти, болници, институции, како и на отворени простори, каде нема можност за одржување дистанца од два метри меѓу граѓаните, како што се пазари, отворени трговски центри, тесни улици, автобуски постојки и слично.

Министерството за здравство вчера потсети дека клучно за справување со вирусот е доследно да се почитуваат протоколите и мерките за заштита од страна на секој граѓанин – носење лична заштитна опрема – маска, одржување на растојание од два метри, честа хигиена и дезинфекција на раце.