Јавниот обвинител Коцевски потврди: Оформен е предмет за даночна измама и за перење пари, сослушани три лица, а за едно предложено мерки за претпазливост

На Sep 14, 2024

„Во текот на вчерашниот ден од страна на Министерството за внатрешни работ (МВР) до Јавното обвинителство за организиран криминал и корупција е доставено известување по претходно собрани одредени податоци, од страна на УЈП, за кривично дело даночно затајување, за делото измама, односно даночна измама и за перење пари. Јавното обвинителство веднаш постапи, оформи предмет и до судот достави барање за издавање наредби за претрес во одредени градови и во одредени фирми и домови. Со тоа што беше успешна акцијата, се прибавија одредени материјални докази и одредени компјутерски материјали“.

Ова вечерва го изјави државниот јавен обвинител, Љупчо Коцевски, во гостување на МТВ.

Прашан дали имаат доволно докази за да се покрене обвинение, Коцевски појасни дека засега е многу рано и додаде оти се работи за предистражна постапка.

– Во моментов само што ме известија, сослушани се три лица пред јавниот обвинител, со тоа што за едно лице се предложени мерки за претпазливост, за одземање на патната исправа и за јавување во судот, односно друг државен орган, во одреден период. И се надеваме дека судот ќе го уважи нашето барање – потенцира Коцевски.

Министерот за внатрешни работи, Панче Тошковски, денеска информира дека по вчерашните претреси во фирми во Струмица, Скопје и Гостивар, приведени се 4 лица за даночно затајување, даночна измама и за перење пари.

– Ова е еден од предметите кои што слободно можам да кажам дека има основани сомненија дека станува збор за епски криминал, кој за жал повторно е на штета на буџетот на Македонија, односно на парите на народот. Првичните информации се дека станува збор за милионски суми кои што се последица на неколку кривични дела, даночно затајување, даночна измама и на перење пари. Во интерес на целокупната постапка не би можел да навлегувам во детали, почитувам пресумпција на невиност – изјави Тошковски во Охрид каде што ги отвори 22. Синдикални спортски игри, во организација на Македонскиот полициски синдикат.

Вчерашната акција беше спроведена на повеќе од десетина локации на територија на земјава. Се постапуваше координирано со Обвинителството за гонење на организиран криминал по наредба на судија на претходна постапка, како и заедно со останати државни институции, како УЈП, Министерство за финансии и Царинската управа.

Претходно на Фејсбук министерката за финансии Гордана Димитриеска-Кочоска изрази благодарност до Управата за јавни приходи и до директорката Елена Петрова, до колегите од Струмица и од другите градови кои, како што наведе, заедно со неа цел ден неуморно работеле во спроведување на акцијата во Струмица.

„Дел од нив директно со мене во Струмица, а дел и низ други градови на Македонија. Исто така, огромна благодарност до Министерството за внатрешни работи, Бирото за јавна безбедност и до Царинската управа кои беа огромна поддршка на колегите од УЈП. Денес покажавме дека сплотениот тим е посилен од сѐ. Продолжуваме посветено и одговорно за доброто на сите!“, објави Димитриеска-Кочоска.